ویب ڈیسک :وزیراعلیٰ پنجاب مریم نواز نے رحمت کارڈ پروگرام کا باضابطہ ڈیجیٹل افتتاح کر دیا، جس کے تحت مستحقین میں رقوم فراہم کی جائے گی۔
تقریب کے دوران صوبائی معاونِ خصوصی راشد اقبال نصراللہ نے رحمت کارڈ پراجیکٹ پر تفصیلی بریفنگ دی۔ بریفنگ میں بتایا گیا کہ اس پروگرام کے لیے صوبائی زکوٰۃ فنڈ سے 5 ہزار ملین روپے کی خطیر رقم مختص کی گئی ہے، جو اس نوعیت کا ایک بڑا فلاحی اقدام ہے۔
حکام کے مطابق رحمت کارڈ کے ذریعے ابتدائی مرحلے میں 50 ہزار مستحق بیواؤں اور یتیم بچوں کو فی کس 1 لاکھ روپے دیے جائیں گے، تاکہ وہ اپنی بنیادی ضروریات پوری کر سکیں اور مالی مشکلات میں کمی لائی جا سکے۔
بریفنگ میں مزید بتایا گیا کہ صرف وہی افراد اس پروگرام کے اہل ہوں گے جو شرعی اصولوں کے مطابق زکوٰۃ کے مستحق ہیں، یعنی مستحق مسلم بیوائیں اور یتیم بچے ہیں اس اقدام کا مقصد حقیقی حقداروں تک امداد کی شفاف اور منصفانہ فراہمی یقینی بنانا ہے۔
وزیراعلیٰ مریم نواز نے اس موقع پر ہدایت کی کہ زکوٰۃ فنڈز کا استعمال مکمل طور پر میرٹ پر کیا جائے اور شفافیت کو ہر صورت یقینی بنایا جائے، تاکہ کسی قسم کی بدعنوانی یا حق تلفی نہ ہو۔
رحمت کارڈ پروگرام کو حکومت پنجاب کی جانب سے سماجی بہبود کے شعبے میں ایک اہم پیش رفت قرار دیا جا رہا ہے، جس سے ہزاروں مستحق خاندانوں کو براہ راست فائدہ پہنچنے کی توقع ہے۔
رحمت کارڈ کے ذریعے بیوہ کے لیے ایک لاکھ اور یتیم بچوں کے لیے ایک لاکھ روپے کی ادائیگی بذریعہ جاز کیش کی جائے گی۔
رجسٹریشن کے لیے مستحقین سی ایم رحمت کارڈ ایپ ڈاؤن لوڈ کریں یا پھر ہیلپ لائن 1077 پر رابطہ کریں۔
بیوہ کے شناختی کارڈ پر بیوہ اسٹیٹس درج ہونا چاہیے، تعلق کم آمدنی والے گھرانے سے ہو، کسی بھی قسم کی سرکاری مالی امداد حاصل نہ کررہے ہوں، سرکاری ملازمہ یا پنشنر نہ ہو۔
سرپرست کا یتیم بچوں کے ب فارم کے ساتھ اندراج ضروری ہے، پی ایس ای آر سروے میں اندراج ہو، مستحق کا موبائل نمبر قومی شناختی کارڈ سے رجسٹرڈ ہو۔
واضح رہے کہ گزشتہ ماہ وزیراعلیٰ پنجاب مریم نواز نے صوبے بھر میں بیواؤں اور یتیموں کو مالی تحفظ فراہم کرنے کے لیے "رحمت کارڈ” اسکیم کی باقاعدہ منظوری دی تھی۔
اعلیٰ سطح کے اجلاس کی صدارت کرتے ہوئے انہوں نے کہا تھا کہ اب معاشرے کا یہ طبقہ خود کو تنہا نہ سمجھے، حکومت ان کی مکمل سرپرستی کرے گی۔
وزیراعلیٰ مریم نواز کا کہنا تھا کہ پسماندہ طبقات کی مدد کرنا حکومت کی بنیادی ذمہ داری ہے اور اس اقدام کا مقصد انہیں معاشی طور پر مستحکم کرنا ہے۔
