رائل پارک (زین مدنی) پاکستان کی شوبز انڈسٹری کی مشہور شخصیات منشا پاشا اور آغا علی پہلی بار میاں اور بیوی کے روپ میں شائقین کو محظوظ کرنے کیلئے بہت جلد ایکشن میں دکھائی دیں گے۔

میڈیا رپورٹس کے مطابق منشا پاشا اور آغا علی جلد ہی ایک ایسی ٹیلی فلم سیریز میں جوڑے کے کردار میں دکھائی دیں گے جو مشکل حالات کی وجہ سے کچھ غیر اہم فیصلے کرتے ہیں اور اس وجہ سے ان کی زندگی ماضی جیسی نہیں رہتی۔

اسی بارے میں منشا پاشا نے ایک انٹرویو میں آنے والی ٹیلی فلم اور اپنے کردار کے حوالے سے بتایا کہ وہ فلم سیریز میں ماہرہ نامی کردار ادا کریں گی جبکہ ان کا کردار انتہائی اہم ہے، وہ اور آغا علی ایک ایسے نوجوان جوڑے کے کردار میں دکھائی دیں گے جن پر مشکل وقت آتا ہے اور اس سے ان کی زندگی میں بہت بڑا بدلاﺅ آتا ہے، حالات کی وجہ سے انہیں نوکری کرنی پڑتی ہے جس کے بعد ان کے مسائل بڑھ جاتے ہیں کیونکہ وہ نوکری کرنے کے دوران اپنے شوہر کے تحفظات اور خدشات کو دور کرنے کیلئے انتہائی محتاط ہوجاتی ہیں اور اس دوران مسائل کا شکار بن جاتی ہے جس کی وجہ سے ان سے انجانے میں کچھ غلط حرکتیں بھی ہوجاتی ہیں۔

انہوں نے کہا کہ ڈرامے میں ان کا انتہائی اہم کردار خواتین کو یہ پیغام دیگا کہ کس طرح خواتین کو مسائل میں اور عدم تحفظ کی صورتحال میں آگے بڑھنا چاہیے۔

آغا علی نے ڈرامے کے سین سے اداکارہ کے ساتھ شادی کے منظر کی تصویر شیئر کرتے ہوئے ان کیلئے نیک خواہشات کا بھی اظہار کیا، آغا علی نے لکھا کہ انہیں منشا پاشا کے ساتھ پہلی بار کام کرکے بہت اچھا لگا، ہدایت کار محمد اشعر اصغر کی ٹیلی فلم سیریز کو حبیب جان نے پروڈیوس کیا ہے اور اسے جلد ہی نجی ٹی وی اے پلس پر نشر کیا جائے گا۔