سٹی42: جمعیت علمائے اسلام صوبائی اور وفاقی حکومت کیخلاف میدان میں آگئی، 8فروری کو پشاور میں احتجاجی مظاہرے کا اعلان کر دیا۔
مفتی محمود مرکز پشاور میں مجلس عاملہ کے اجلاس کا انعقاد کیا گیا جس میں جے یو آئی نے صوبائی اور وفاقی حکومت کے خلاف احتجاجی مظاہرے کا اعلان کر دیا۔ پارٹی قیادت کے مطابق احتجاج 8 فروری کو پشاور میں کیا جائے گا، جس میں بدامنی، کرپشن اور صوبے کو درپیش سنگین مسائل پر حکومت کی کارکردگی کے خلاف آواز بلند کی جائے گی۔
جے یو آئی کے رہنما جلیل جان نے کہا کہ احتجاج کا فیصلہ مفتی محمود مرکز پشاور میں ہونیوالے مجلس عاملہ کے اجلاس میں کیا گیا۔اجلاس میں اس بات پر تشویش کا اظہار کیا گیا کہ صوبے میں امن و امان کی صورتحال مسلسل خراب ہو رہی ہے جبکہ حکومتی سطح پر مسائل کے حل میں کوئی سنجیدگی نظر نہیں آ رہی۔ انہوں نے کہا کہ اجلاس کے دوران تیراہ اور کرم کے متاثرین کے لیے 4 ارب روپے کی منظوری کے باوجود متاثرہ خاندانوں کی نقل مکانی سے متعلق ابہام پر افسوس کا اظہار کیا گیا۔ جلیل جان کے مطابق متاثرین کو ریلیف نہ ملنا حکومتی نااہلی کا واضح ثبوت ہے۔
جے یو آئی قیادت کا کہنا ہے کہ پشاور میں ہونے والا احتجاج بھرپور اور منظم ہوگا، جس میں کارکنان اور عوام کی بڑی تعداد شرکت کرے گی، تاکہ حکومت کو عوامی مسائل کی سنگینی کا واضح پیغام دیا جا سکے۔