ویب ڈیسک:  پنجاب حکومت کی جانب سے شبِ برات کے موقع پر بدھ 4 فروری کو عام تعطیل دینے کا امکان ظاہر کیا جا رہا ہے۔اگر حکومت کی جانب سے تعطیل کا باضابطہ نوٹیفکیشن جاری کر دیا گیا تو شہریوں کو ایک ساتھ مسلسل 5 چھٹیوں کا موقع مل سکتا ہے، جس سے سرکاری و نجی اداروں، تعلیمی اداروں اور کاروباری طبقے میں خوشی کی لہر دوڑ گئی ہے۔

شہریوں کا کہنا ہے کہ مسلسل تعطیلات سے انہیں مذہبی عبادات کے ساتھ ساتھ اہلِ خانہ کے ساتھ وقت گزارنے کا بھی موقع ملے گا، تاہم حتمی فیصلے کا انتظار کیا جا رہا ہے۔پنجاب حکومت کی جانب سے تاحال اس حوالے سے کوئی باضابطہ اعلان نہیں کیا گیا، تاہم شبِ برات کے پیش نظر عام تعطیل دیے جانے کے امکانات روشن ہیں۔

یاد رہے کہ حکومتِ پنجاب نے ضلعی انتظامیہ کی سفارش پر 6 فروری کو لاہور میں بسنت کے موقع پر مقامی تعطیل کا اعلان کر دیا ہے، تاکہ شہری بھرپور انداز میں بسنت کی تقریبات میں حصہ لے سکیں اور جشن کو محفوظ اور منظم بنایا جا سکے۔ ضلعی انتظامیہ نے بسنت کے پیش نظر تعطیل کی تجویز دی تھی، جس کی منظوری پنجاب حکومت نے دے دی ہے۔ اس فیصلے کے بعد لاہور میں جمعرات، جمعہ، ہفتہ اور اتوار ملا کر چار دن کی تعطیلات ہوں گی، جس سے شہریوں کو لانگ ویک اینڈ میسر آئے گا۔

حکام کے مطابق جمعرات، ہفتہ اور اتوار کی چھٹیاں پہلے سے طے تھیں، جبکہ صوبائی حکومت نے جمعہ المبارک کو بھی تعطیل دینے کا فیصلہ کیا ہے۔ اس اقدام کا مقصد بسنت کے دوران ٹریفک کے دباؤ کو کم کرنا اور شہریوں کو محفوظ ماحول فراہم کرنا ہے۔

دوسری جانب ڈپٹی کمشنر لاہور نے شہریوں کو ہدایت کی ہے کہ 18 سال سے کم عمر بچے بسنت کی تقریبات اہلخانہ کے ہمراہ منائیں، تاکہ روایتی تہوار کے دوران تحفظ اور نظم و ضبط کو یقینی بنایا جا سکے۔