کلیم اختر:  پنجاب حکومت نے ہمت کارڈ کے تحت مالی سال 2026-27 کی پہلی سہ ماہی کی قسط جاری کر دی۔

پہلی سہ ماہی کے دوران صوبے بھر میں ایک لاکھ 10 ہزار مستحق افراد میں ایک ارب 15 کروڑ 50 لاکھ روپے تقسیم کیے جائیں گے۔

اس حوالے سے صوبائی وزیر سوشل ویلفیئر و بیت المال سہیل شوکت بٹ کی زیر صدارت اجلاس منعقد ہوا، جس میں ڈی جی سوشل ویلفیئر ڈاکٹر شہنشاہ فیصل عظیم اور دیگر متعلقہ افسران نے شرکت کی۔

اجلاس میں صوبائی وزیر کو ہمت کارڈ سے متعلق تفصیلی بریفنگ دی گئی۔ حکام کے مطابق ہمت کارڈ ہولڈرز اور محکمہ خصوصی تعلیم کے طلبہ وظائف سے مستفید ہوں گے۔

صوبائی وزیر سہیل شوکت بٹ نے کہا کہ حکومت پنجاب ہمت کارڈ وظائف کی بروقت ادائیگی یقینی بنا رہی ہے۔ ان کا کہنا تھا کہ بروقت مالی امداد سے مستحق افراد کی ضروریات پوری کرنے میں مدد ملے گی، جبکہ ہمت کارڈ کے ذریعے خصوصی افراد کو مالی تحفظ فراہم کیا جا رہا ہے۔

انہوں نے ہدایت کی کہ ہمت کارڈ وظائف کی تقسیم شفاف، تیز اور بلا رکاوٹ بنائی جائے، جبکہ تمام اضلاع میں وظائف کی بروقت اور شفاف تقسیم یقینی بنائی جائے۔