علی ساہی:  پنجاب پولیس کے ملازمین کے خصوصی بچوں کے لیے ماہانہ وظائف میں نمایاں اضافے کی منظوری دے دی گئی ہے۔

ترجمان پنجاب پولیس کے مطابق تھیلیسیمیا سے متاثرہ بچوں کا ماہانہ وظیفہ 15 ہزار روپے سے بڑھا کر 30 ہزار روپے کر دیا گیا ہے۔

اسی طرح سیریبرل پالسی میں مبتلا بچوں کا وظیفہ 10 ہزار روپے سے بڑھا کر 20 ہزار روپے مقرر کر دیا گیا ہے، جبکہ آٹزم کا شکار پولیس ملازمین کے بچوں کو بھی ماہانہ 10 ہزار روپے وظیفہ دینے کی منظوری دے دی گئی ہے۔

آئی جی پنجاب ڈاکٹر عثمان انور کا کہنا ہے کہ “پولیس فورس ایک فیملی کی مانند ہے اور ملازمین اور ان کے اہلِ خانہ کی فلاح و بہبود ہماری اولین ترجیح ہے”۔

 انہوں نے بتایا کہ پنجاب پولیس کی ویلفیئر پر روزانہ 2 کروڑ 20 لاکھ روپے کی خطیر رقم خرچ کی جا رہی ہے۔