سعید احمد:چینی ایئرلائن چائنہ سدرن نے لاہور کیلئے پروازوں کی تعداد میں نمایاں اضافہ کرتے ہوئے روزانہ پرواز آپریٹ کرنے کا اعلان کر دیا ہے۔

ایئرلائن کے مطابق گوانگ زو سے لاہور کیلئے ہفتہ وار 7 پروازیں چلائی جائیں گی، جو یکم جنوری 2026 سے باقاعدہ طور پر شروع ہوں گی۔

ذرائع کے مطابق چائنہ سدرن ایئرلائن روزانہ پروازوں کے لیے ایئربس اے330 ساختہ طیارے استعمال کرے گی۔ اس سے قبل ایئرلائن لاہور روٹ پر ہفتہ وار 5 پروازیں آپریٹ کر رہی تھی، جن میں بوئنگ 787 طیارہ استعمال کیا جاتا تھا۔

ایوی ایشن حکام کا کہنا ہے کہ پروازوں کی تعداد میں اضافے سے پاکستان اور چین کے درمیان فضائی روابط مزید مضبوط ہوں گے، جبکہ کاروباری طبقے، سیاحوں اور طلبہ کو بھی بہتر سفری سہولت میسر آئے گی۔ ماہرین کے مطابق لاہور کیلئے روزانہ پروازوں کا آغاز دونوں ممالک کے تجارتی اور سفارتی تعلقات میں مزید بہتری کا باعث بنے گا۔

چائنہ سدرن کی جانب سے پروازوں میں اضافے کو لاہور ایئرپورٹ کی سرگرمیوں میں اضافے اور بین الاقوامی مسافروں کیلئے ایک مثبت پیش رفت قرار دیا جا رہا ہے۔