سٹی42: پاکستان میں زیر التوا نمبر پلیٹس کے اجرا کے حوالے سے خوشخبری آ گئی ہے۔ این آر ٹی سی (National Radio Telecommunication Corporation) کو کنٹریکٹ جاری کر دیا گیا ہے تاکہ زیر التوا نمبر پلیٹس مالکان تک پہنچائی جا سکیں۔

ذرائع کے مطابق زیر التوا نمبر پلیٹس میں موٹرسائیکلوں کی 9 لاکھ اور گاڑیوں کی 2 لاکھ نمبر پلیٹس شامل ہیں، جو سال 2019 اور 2020 کی ہیں اور کنٹریکٹ ختم ہونے کی وجہ سے گزشتہ دو سال سے التوا کا شکار تھیں۔

این آر ٹی سی نے سابقہ کنٹریکٹ کے دوران 50 لاکھ سے زائد نمبر پلیٹس کا اجرا کامیابی سے کیا تھا، اور نئے کنٹریکٹ کے تحت یہ پروسیس 1 سال کے اندر مکمل کرنے کا ہدف رکھا گیا ہے۔

واضح رہے کہ گزشتہ سال اپریل میں محکمہ ایکسائز نے نمبر پلیٹس کی فیس لینا بند کر دی تھی تاہم شہریوں کو سٹینڈرڈ کے مطابق پرائیویٹ نمبر پلیٹس بنوا کر لگوانا لازمی ہے۔