(مانیٹرنگ ڈیسک) بلوچستان کے دارالحکومت کوئٹہ کے علاقے بلیلی میں دھماکے سے بچے سمیت 3 افراد جاں بحق جبکہ 20 پولیس اہلکاروں سمیت 28 افراد زخمی ہوگئے۔ 

پولیس کے مطابق دھماکے میں بلوچستان کانسٹیبلری کے ٹرک کو نشانہ بنایا گیا، دھماکے کے باعث قریب سے گزرنے والی گاڑیاں بھی زد میں آگئیں، دھماکے میں 20 پولیس اہلکاروں سمیت عام شہری بھی زخمی ہوئے، دھماکے میں زخمی ہونے والے پولیس اہلکاروں اور دیگر افراد کو سول ہسپتال منتقل کر دیا گیا ۔

پولیس حکام کا کہنا ہے کہ دھماکے کے بعد پولیس اور بم ڈسپوزل کو موقع پر طلب کر لیا گیا ہے، جائے وقوعہ کا محاصرہ کر کے شواہد اکٹھے کیے جا رہے ہیں۔

ڈی آئی جی غلام اظفر مہیسر کا کہنا ہے کہ بلیلی دھماکے میں3 افراد جاں بحق  جبکہ 20 پولیس اہلکاروں سمیت 28افراد زخمی ہوئے۔

انہوں نے بتایا کہ خود کش حملے میں 20 سے 25 کلو گرام دھماکا خیز مواد استعمال کیا گیا، پولیس اہلکار ٹرک پر پولیو ڈیوٹی کے لیے جا رہے تھے۔