سٹی42: لیسکو (لاہور الیکٹرک سپلائی کمپنی) کے بورڈ آف ڈائریکٹرز نے اپنے اعزازیہ میں 100 فیصد اضافہ کر دیا ہے، جس کے بعد ہر میٹنگ میں بورڈ کے ہر ممبر کو ایک لاکھ روپے اعزازیہ دیا جائے گا۔
ذرائع کے مطابق چیئرمین بورڈ آف ڈائریکٹرز عامر رضیا کے ہوائی سفر کے اخراجات علیحدہ ہوں گے جبکہ ہوائی سفر کے بعد لاہور میں قیام و طعام کے لیے وی وی آئی پی ہوٹل کی بکنگ بھی لیسکو کی ذمہ داری ہوگی۔
لیسکو بورڈ کی اس بڑھتی ہوئی مراعات کے فیصلے پر صارفین کے لیے کوئی سہولت میسر نہیں ہو رہی، بلکہ کمپنی میں میٹریل کی قلت کے باعث صارفین کو شدید مشکلات کا سامنا ہے۔
ذرائع کے مطابق لیسکو میں سنگل فیز، ایچ ٹی میٹرز سمیت دیگر میٹریل کا بحران ہے، اور ٹرانسفارمرز اور ڈی فیوز سیٹ کی قلت کی وجہ سے نئے کنکشن لگانے کا عمل منجمد ہو چکا ہے۔ علاوہ ازیں نیٹ میٹرنگ پراجیکٹ پر بھی بورڈ آف ڈائریکٹرز کی خاموشی برقرار ہے، جس کے باعث مختلف دفاتر میں کنکشنز کی تنصیب التوا کا شکار ہو گئی ہے۔