ویب ڈیسک: ڈپٹی کمشنر خرم پرویز نے خواجہ غلام فریدؒ کے سالانہ عرس کے موقع پر یکم اکتوبر بروز بدھ ضلع بھر میں مقامی تعطیل کا اعلان کر دیا ہے۔
ڈی سی آفس سے جاری نوٹیفکیشن کے مطابق تعطیل صرف ضلع رحیم یار خان کی ریونیو حدود تک محدود ہوگی۔ اس روز تمام سرکاری دفاتر بند رہیں گے، تاہم وفاقی ادارے، بینک اور جاری امتحانات معمول کے مطابق جاری رہیں گے۔
نوٹیفکیشن کی کاپیاں ایڈیشنل چیف سیکرٹری پنجاب، سیکرٹری داخلہ، کمشنر بہاولپور، ڈسٹرکٹ اینڈ سیشن جج، ڈسٹرکٹ پولیس آفیسر اور دیگر متعلقہ محکموں کو ارسال کر دی گئی ہیں تاکہ انتظامی امور کو یقینی بنایا جا سکے۔
خواجہ غلام فریدؒ برصغیر کے معروف صوفی شاعر اور بزرگ تھے، جن کا سالانہ عرس ہر سال عقیدت و احترام کے ساتھ منایا جاتا ہے۔ تقریبات میں محافلِ نعت و سماع، مذہبی اجتماعات اور ثقافتی سرگرمیاں شامل ہوتی ہیں، جن میں ہزاروں عقیدت مند شرکت کرتے ہیں۔