سٹی42: وزیراعلیٰ پنجاب مریم نواز شریف نے فالج (سٹروک) کے علاج اور مریضوں کی فوری نگہداشت کو بہتر بنانے کے لیے جامع حکمتِ عملی کا اعلان کیا ہے۔ انہوں نے ہر ضلع میں سٹروک مینجمنٹ سنٹر قائم کرنے کی منظوری دے دی ہے جبکہ ہر ڈسٹرکٹ ہیڈ کوارٹر (ڈی ایچ کیو) ہسپتال میں نیورالوجسٹ اور پیڈز نیورالوجسٹ تعینات کرنے کا اصولی فیصلہ بھی کیا گیا ہے۔

وزیراعلیٰ نے فالج کے مریضوں کے لیے ٹیلی میڈیسن پراجیکٹ فوری شروع کرنے کا حکم دیا ہے تاکہ ضلعی ہسپتالوں کے ڈاکٹرز فالج کے مریضوں کے علاج کے لیے سپیشلسٹ اور کنسلٹنٹ سے ٹیلی فونک رابطہ کر سکیں۔ انہوں نے کہا کہ وہ خود فالج کے علاج کے حوالے سے عوامی آگاہی مہم کی قیادت کریں گی اور فالج کے علاج میں گولڈن آورز کی اہمیت کو اجاگر کریں گی۔

وزیراعلیٰ مریم نواز نے مزید ہدایت کی کہ ہر ضلع میں ایک ڈاکٹر اور ایک نرس کو فوری طور پر تین ماہ کی سٹروک مینجمنٹ ٹریننگ دی جائے جبکہ ریسکیورز کو بھی سٹروک مینجمنٹ ٹریننگ کرانے کے اقدامات کیے جائیں۔ انہوں نے پنجاب کے ہر چلڈرن ہسپتال میں سٹروک مینجمنٹ سینٹر قائم کرنے کی بھی ہدایت دی اور کہا کہ وہ چاہتی ہیں کہ کسی مریض کو علاج کے لیے بڑے شہر نہ جانا پڑے۔

خصوصی اجلاس کے دوران پمز کے نیورالوجسٹ ڈاکٹر قاسم بشیر نے سٹروک مینجمنٹ پروگرام پر بریفنگ دی اور بتایا کہ 25 سال سے زائد العمر افراد میں ہر 4 میں سے ایک شخص کو فالج کا خطرہ ہوتا ہے۔ انہوں نے کہا کہ فالج کے پری ہاسپٹل، ہاسپٹل اور پوسٹ ہاسپٹل کیئر کے لیے عوامی آگاہی اور ٹریننگ لازمی ہے۔