اویس کیانی: وفاقی وزیر داخلہ محسن نقوی نے اوورسیز پاکستانیوں کو یقین دلایا ہے کہ ان کی جائیداد اور اثاثوں کے حقوق کا مکمل تحفظ کیا جائے گا۔ انہوں نے کہا ہے کہ اسلام آباد میں قانونی ملکیت پر کسی کو قبضے کی اجازت نہیں دی جائے گی اور سرمایہ کار دوست ماحول فراہم کرنے کے لیے فوری اور شفاف کارروائی یقینی بنائی جائے گی۔

محسن نقوی نے اوورسیز پاکستانیوں سے متعلق ایکس (Twitter) پر جاری پیغام میں بتایا کہ ڈی سی اسلام آباد قبضہ یا غیر قانونی تجاوزات کی شکایت پر 7 دن کے اندر فیصلہ کرنے کا پابند ہوگا۔ انہوں نے کہا کہ اوورسیز پاکستانیوں کی اسلام آباد میں سرمایہ کاری خوش آئند اور قابلِ قدر ہے اور اس کے تحفظ کے لیے ہر ممکن اقدامات کیے جائیں گے۔

وزیر داخلہ نے مزید کہا کہ سرمایہ کاروں کو محفوظ ماحول فراہم کیا جائے گا اور اوورسیز پاکستانیوں کے اثاثوں کے تحفظ کے لیے فوری، شفاف اور موثر کارروائی کی جائے گی تاکہ قانونی ملکیت کو کوئی خطرہ نہ ہو۔