علی ساہی :صوبہ بھر میں ہیلمٹ اور سیٹ بیلٹ کی خلاف ورزیوں کے خلاف کارروائیوں میں نمایاں تیزی آ گئی ہے۔

ترجمان ٹریفک پولیس کے مطابق صوبے بھر میں ہیلمٹ کی خلاف ورزی پر 3 لاکھ 45 ہزار سے زائد شہریوں کو جرمانے کیے گئے، جبکہ صرف لاہور میں 49 ہزار سے زائد چالان ٹکٹ جاری کیے گئے ہیں۔

ترجمان کا کہنا ہے کہ مؤثر انفورسمنٹ کے نتیجے میں صوبے بھر میں ہیلمٹ کی خلاف ورزیوں میں 85 فیصد کمی ریکارڈ کی گئی ہے، جبکہ ہیلمٹ کے استعمال سے ہیڈ انجری کے واقعات میں 82 فیصد کمی واقع ہوئی ہے۔

رواں ماہ بغیر سیٹ بیلٹ گاڑی چلانے پر 7 ہزار سے زائد چالان ٹکٹ جاری کیے گئے، جبکہ سیٹ بیلٹ کی خلاف ورزیوں میں بھی صوبہ بھر میں نمایاں کمی دیکھنے میں آئی ہے۔ حکام کے مطابق ہیلمٹ اور سیٹ بیلٹ کی خلاف ورزیوں پر بلا تفریق کارروائیاں جاری ہیں۔

ڈی آئی جی ٹریفک پنجاب محمد وقاص نذیر نے کہا ہے کہ ہیلمٹ اور سیٹ بیلٹ کی پابندی کا مقصد چالان کرنا نہیں بلکہ قیمتی انسانی جانوں کا تحفظ ہے۔ ان کا کہنا تھا کہ حادثے کی صورت میں ہیلمٹ کا استعمال شہریوں کو شدید ہیڈ انجری سے محفوظ رکھتا ہے۔

ترجمان کے مطابق ٹریفک قوانین پر سخت عملدرآمد اور آگاہی مہمات کے باعث سڑکوں پر نظم و ضبط میں واضح بہتری آئی ہے۔