سٹی42: پنجاب پولیس نے صوبے بھر میں دھاتی ڈور اور غیر قانونی پتنگ بازی کے خلاف سخت کارروائیاں شروع کر دی ہیں۔ پولیس نے واضح کیا ہے کہ اینٹی کائٹ فلائنگ ایکٹ کی خلاف ورزی پر زیرو ٹالرنس پالیسی اختیار کی گئی ہے اور بسنت کے مخصوص دنوں کے علاوہ کسی بھی جگہ پتنگ بازی قابل برداشت نہیں ہوگی۔
پنجاب پولیس کے ترجمان کے مطابق رواں سال انسداد پتنگ بازی ایکٹ کی خلاف ورزی پر مجموعی طور پر 2,234 ملزمان گرفتار کیے گئے ہیں جبکہ کریک ڈاؤن کے دوران 2,210 مقدمات درج کیے گئے۔ اس دوران پولیس نے 1,52,808 پتنگیں اور 3,148 ڈور چرخیاں برآمد کیں۔
لاہور میں بھی پولیس نے کارروائیاں تیز کرتے ہوئے 1,020 ملزمان کو گرفتار کیا اور مقدمات درج کیے۔ لاہور میں ملزمان سے 35,547 پتنگیں اور 860 ڈور چرخیاں برآمد کی گئیں۔
ڈی آئی جی آپریشنز ڈاکٹر عثمان انور نے واضح کیا کہ بسنت کی اجازت صرف مخصوص دنوں کے لیے ہے جبکہ صوبے بھر میں کسی بھی جگہ غیر قانونی پتنگ بازی برداشت نہیں کی جائے گی۔ آئی جی پنجاب نے والدین سے کہا ہے کہ وہ اپنے بچوں کو اس خونی کھیل سے دور رکھیں اور قانون کے خلاف ورزی کرنے والوں کے خلاف فوری کارروائی کی جائے گی۔