ویب ڈیسک: معروف اداکارہ اور مارننگ شو ہوسٹ فضا علی نے دعویٰ کیا ہے کہ ان کے طلاق سے متعلق پرانے بیانات کو جان بوجھ کر دوبارہ سوشل میڈیا پر وائرل کیا گیا، جس کے پیچھے ان کے مطابق ندا یاسر کا کردار ہو سکتا ہے۔ فضا علی کا کہنا ہے کہ سچ بولنے کی انہیں یہ قیمت ادا کرنا پڑی۔

پاکستانی ٹی وی کی معروف اداکارہ اور میزبان فضا علی ایک بار پھر خبروں کا حصہ بن گئی ہیں۔ حالیہ گفتگو میں انہوں نے دعویٰ کیا کہ ان کے طلاق سے متعلق پرانے ویڈیو کلپس کو دانستہ طور پر دوبارہ سوشل میڈیا پر پھیلایا گیا، تاکہ ان کی ذاتی زندگی کو نشانہ بنایا جا سکے۔

فضا علی کے مطابق انہوں نے حال ہی میں موٹر سائیکل سوار ڈیلیوری رائیڈرز کے حق میں آواز اٹھائی اور منطقی انداز میں اپنا مؤقف پیش کیا، مگر اس کے بعد ان کی ذاتی زندگی سے جڑا ایک پرانا معاملہ دوبارہ اچھال دیا گیا۔ ان کا کہنا تھا کہ معاشرے میں پہلے ہی کئی سنگین مسائل موجود ہیں، لیکن اصل موضوع پر بات کرنے کے بجائے ان کی نجی زندگی کو مرکزِ بحث بنا دیا گیا۔

انہوں نے کہا کہ طلاق ایک تکلیف دہ مرحلہ ہوتا ہے، خاص طور پر خواتین کو اس کے بعد زیادہ تنقید اور دباؤ کا سامنا کرنا پڑتا ہے۔ فضا علی کے مطابق وہ اس مرحلے سے آگے بڑھ چکی تھیں، مگر پرانے بیانات کو دوبارہ سامنے لا کر انہیں ایک بار پھر وضاحتیں دینے پر مجبور کیا گیا۔

فضا علی نے اس بات پر بھی زور دیا کہ کسی کی ذاتی تکلیف کو تفریح یا مواد کے طور پر پیش کرنا درست عمل نہیں۔ ان کا کہنا تھا کہ درد کا تعلق کسی ایک جنس سے نہیں ہوتا اور عزت کی کوئی مدت ختم نہیں ہوتی۔

انہوں نے واضح کیا کہ اگر سوشل میڈیا پر ان کے مزید پرانے کلپس بھی شیئر کیے جائیں تو اس سے ان کے کردار پر کوئی حرف نہیں آتا، بلکہ ان کی مضبوطی اور سچائی ہی مزید نمایاں ہو کر سامنے آئے گی۔