ویب ڈیسک:پاکستان تحریک انصاف کے رہنما شیخ رشید نے کہا ہے کہ مئی کا مہینہ سیاست میں  ہنگامہ خیز مہینہ ہو گا۔

سماجی رابطے کی ویب سائٹ پر اپنے ایک پیغام میں سابق وفاقی وزیر شیخ رشید نے موجودہ حکومت پر تنقید کی ہے۔ شیخ رشید نے اپنے پیغام میں کہا ہے کہ پیٹرول اور بجلی پر آئی ایم ایف کے دباؤ پر سبسڈی ختم کرنے سے حکومت اپنی سیاسی قبرخود کھودے گی۔

انہوں نے کہا کہ سامراجی سازش کے تحت عوام کو سستی  گیس ، پیٹرول اور گندم سے محروم  کر دیا گیا ہے اور جلد ہی پیٹرول پر سبسڈی ختم کردی جائیگی۔

ان کا کہنا تھا کہ عمران خان روس سے  تیس فیصد سستی گیس، پیٹرول اور گندم لینے جا رہا تھا، اس اقدام سے ملک  میں عوام کو بھت ریلیف ملتا اور مہنگائی میں کمی آتی ۔

#امپورٹڈ_حکومت_نامنظور pic.twitter.com/Ro6H2MSngC

— Sheikh Rashid Ahmed (@ShkhRasheed) April 26, 2022

شیخ رشید کا کہنا تھا کہ پاکستان میں اگلا مہینہ عید کے بعد ہنگامہ خیز ہو گا اور ملک کے مسائل کاواحد حل الیکشن رہ گیا ہے جسے جتنا جلدی مکمل کر لیا جائے اتنا ہی  ملک کیلئے بہتر ہو گا۔

خیال رہے کہ گزشتہ روز انہوں نے اپنے پیغام میں کہا  کہ ایمپورٹیڈ حکومت کی جانب سے فرار کی تیاریاں شروع کردی گئی ہے جس کا آغاز ای سی ایل سے ڈیرھ سو ملزمان کا نام نکال کر کیا گیا ہے۔

شیخ رشید نے اپنے پیغام میں دعویٰ کیا ہے کہ سرکاری خزانے کا بے دریغ استعمال دوبارہ شروع ہو چکا ہے۔انہوں نے کہا کہ ایمپورٹیڈ حکومت کی کوئی آئینی حیثیت نہیں ہے کیونکہ یہ بیرونی سازش کے تحت چور دروازے سے بنی ہے۔

انہوں نے مزید کہا کہ فوج عوام کی رائے کی قدر کرتی ہے اس وجہ سے جلد ہی اس ایمپورٹیڈ حکومت سے جان چھوٹے گی۔ان کا کہنا تھا کہ سپریم کورٹ سے جلد اچھی خبریں متوقع ہیں۔