سعید احمد:پاکستان ریلوے میں مسافر ٹرینوں کی بروقت آمدورفت کی شرح میں شدید کمی ہوگئی، گزشتہ ماہ ٹرینوں کی پنکچویلٹی کی شرح صرف 35 فیصد ریکارڈ کی گئی۔

اعداد و شمار کے مطابق ریلوے سسٹم میں چلنے والی 923 ٹرینوں میں سے 601 ٹرینیں تاخیر کا شکار رہیں۔ ریلوے انفراسٹرکچر اور رولنگ اسٹاک کی خرابی کے باعث آپریشن شدید متاثر ہوا، جبکہ ٹریک پر فنی رکاوٹیں، حادثات اور سیلابی صورتحال نے بھی ٹرینوں کی آمدورفت میں مشکلات پیدا کیں۔

رپورٹ کے مطابق گزشتہ ماہ ریلوے ٹرین آپریشن کے مجموعی طور پر 2 ہزار 265 گھنٹے ضائع ہوئے۔ ان میں ٹریک پر فنی رکاوٹوں کے باعث 482 گھنٹے، کنیکٹنگ ریل لنکس سے 374 گھنٹے، موسم کی خرابی سے 320 گھنٹے، حادثات سے 229 گھنٹے، سگنل خرابی سے 203 گھنٹے، لوکوموٹو خرابی سے 110 گھنٹے اور کیری خرابی سے 91 گھنٹے شامل ہیں۔

ذرائع کے مطابق سیلابی صورتحال کے باعث آئندہ دنوں میں ٹرین آپریشن میں مزید تعطل کا خدشہ ظاہر کیا جا رہا ہے۔