راؤ دلشاد:بابا گرونانک کے 556ویں جنم دن کی تقریبات کے سلسلے میں بھارت سمیت دنیا بھر سے سکھ یاتریوں کی پاکستان آمد کا سلسلہ جاری ہے۔

ذرائع کے مطابق حکومتِ پاکستان نے بھارتی یاتریوں کو ویزے جاری کر دیے ہیں، اور 2 ہزار 200 سکھ یاتری 4 نومبر کو واہگہ بارڈر کے راستے لاہور پہنچیں گے۔

سکھ یاتری 10 روز تک پاکستان میں قیام کریں گے، اس دوران وہ جنم استھان ننکانہ صاحب، حسن ابدال پنجہ صاحب، کرتارپور صاحب اور لاہور میں واقع ڈیرہ صاحب پر مذہبی رسومات ادا کریں گے۔

بھارت کے علاوہ برطانیہ، امریکا، یورپ، آسٹریلیا، نیوزی لینڈ، کینیڈا اور دیگر ممالک سے بھی سکھ یاتری پاکستان پہنچیں گے۔

واضح رہے کہ بیساکھی میلے کے موقع پر رواں سال 5 ہزار 800 یاتریوں نے پاکستان کا دورہ کیا تھا۔