سٹی42: گرمیوں کی آمد کے ساتھ ہی مٹی کے گملوں کی مانگ میں واضح اضافہ دیکھنے میں آیا ہے۔

 گھروں، دفاتر اور باغیچوں کی تزئین و آرائش کے شوقین افراد کی جانب سے گملوں کی خریداری میں تیزی آئی ہے جس کے باعث کاریگر دن رات گملے تیار کرنے میں مصروف ہیں۔

کاریگروں کا کہنا ہے کہ دورِ جدید میں بھی مٹی کے گملے بنانا محض ایک کاروبار نہیں بلکہ ایک فن اور ہنر ہے۔ گیلی مٹی کو خوبصورت شکل دینا ایک محنت طلب عمل ہے جس میں مہارت، صبر اور تجربہ درکار ہوتا ہے۔

ایک کاریگر نے بتایا کہ ہر گملا ہماری محنت اور فن کا نمونہ ہوتا ہے، یہ کام وقت لیتا ہے لیکن اس سے ملنے والا سکون اور خوشی سب سے زیادہ ہے۔

مٹی کے گملے نہ صرف سستے اور ماحول دوست ہوتے ہیں بلکہ پودوں کی نشوونما کے لیے بھی مفید سمجھے جاتے ہیں۔ ان گملوں کی بڑھتی ہوئی طلب اس بات کا ثبوت ہے کہ قدیم روایتی ہنر آج بھی اپنی اہمیت برقرار رکھے ہوئے ہے۔