ملک اشرف : لاہور ہائیکورٹ اور صوبہ بھر کی ماتحت عدالتوں میں قائداعظم ڈے کے موقع پر آج عام تعطیل ہے، جس کے باعث عدالتی کارروائیاں معطل ہیں.

دوسری جانب لاہور ہائیکورٹ میں کل 26 دسمبر سے 15 روزہ عدالتی تعطیلات کا باقاعدہ آغاز ہو جائے گا۔ لاہور ہائیکورٹ میں 26 دسمبر سے 8 جنوری تک موسمِ سرما کی تعطیلات ہوں گی، جس دوران معمول کی عدالتی سرگرمیاں محدود کر دی جائیں گی۔
عدالتی تعطیلات کے دوران ججز کی دستیابی بھی محدود رہے گی۔ چھٹیوں کے پہلے ہفتے میں لاہور ہائیکورٹ کے پرنسپل سیٹ پر 20 ججز جبکہ دوسرے ہفتے کے دوران صرف 8 ججز مقدمات کی سماعت کریں گے۔ تعطیلات کے باعث کیسز کی سماعت مخصوص دائرہ کار تک محدود رہے گی۔موسمِ سرما کی تعطیلات کے دوران ہائیکورٹ میں صرف مخصوص نوعیت کے مقدمات سنے جائیں گے۔ ان میں درخواستِ ضمانت، حبسِ بے جا، حکمِ امتناعی، فوری نوعیت کے معاملات اور دیگر اہم کیسز شامل ہوں گے، جب کہ عام نوعیت کے مقدمات کی سماعت تعطیلات کے بعد کی جائے گی۔