سٹی 42 : نائب وزیراعظم اسحاق ڈار سے بین الاقوامی مالیاتی فنڈ کے وفد کی ملاقات ہوئی۔ 

ترجمان دفتر خارجہ کے مطابق آئی ایم ایف کے مشرق وسطیٰ و وسط ایشیا کے شعبے کے ڈائریکٹر جہاد ازعور کی قیادت میں وفد نے نائب وزیر اعظم  اسحاق ڈار سے ملاقات کی۔  معاونِ خصوصی طارق باجوہ، سیکرٹری خزانہ، اور ایف بی آر اور وزارت خارجہ کے افسر بھی اس موقع پر موجود تھے ۔ 

اسحاق ڈار نے توسیعی فنڈ سہولت  کے تحت پہلا جائزہ کامیابی سے مکمل ہونے پر اطمینان کا اظہار کیا، انہوں نے پاکستان کے ساتھ مسلسل تعاون پر آئی ایم ایف سے اظہار تشکر کیا ۔  اسحاق ڈار  نے کہا کہ ریزیلینس اینڈ سسٹین ایبلیٹی فیسلٹی  کے تحت معاونت پر بھی آئی ایم ایف کے مشکور ہیں ۔ انہوں نے پائیدار معاشی استحکام کے حصول، اہم ساختی اصلاحات پر عملدرآمد، اور طویل المدتی، جامع اقتصادی ترقی کو فروغ دینے کے لیے پاکستان کے پختہ عزم کا اعادہ کیا ۔ 

آئی ایم ایف کے وفد نے پاکستان کی جاری اصلاحاتی کوششوں کی تعریف کی، اور پاکستان کے اقتصادی ترقی کے ایجنڈے کے لیے فنڈ کے مسلسل تعاون کا اعادہ کیا ۔