(فاران امین)گزشتہ کئی روز سے برائلر مرغی گوشت کی قیمت میں تواتر سے اضافہ جاری ہے، اب ایک بار پھر   برائلر مرغی گوشت کی قیمت آسمان کی بلندی پر پہنچ گئی۔

تفصیلات کے مطابق لاک ڈاؤن میں نرمی کے ساتھ مرغی گوشت کی قیمتوں کو پر لگ گئے،مزید سات روپےفی کلو اضافہ  کر دیا گیا جس کےبعد   مرغی کا گوشت 429 روپے فی کلو میں فروخت ہونے لگا۔ گزشتہ روز بھی مرغی گوشت کی قیمت میں بارہ روپے اضافہ ہوا تھا۔دو روز میں گوشت کی قیمت میں مجموعی طور پر انیس روپے اضافہ دیکھا گیا ہے،خریداروں کا کہنا ہے کہ اچانک گوشت کی قیمتوں میں اضافہ ان کی سمجھ سے باہر ہے،ایک مرغی کا گوشت تھا جو سستا تھا اور غریب اسے دسترخوان کی زینت بنا لیتا تھا مگر اب یہ بھی مہنگا ہوگیا ۔

صرف صارفین ہی نہیں دکاندار بھی بڑھتی قیمتوں سے شدید پریشان ہیں، کہتے ہیں اتنا مہنگا گوشت خریدنے گاہک نہیں آتے سارا دن فارغ بیٹھے رہتے ہیں اکا دکا گاہک ہی آتے ہیں۔

دوسری جانب  شہری مہنگے داموں سبزیاں اور پھل خریدنے پر مجبور ہیں،شہر کی سبزی و فروٹ منڈیوں میں بھی منافع خور مافیا بے لگام ہو گیا ہے۔سرکاری نرخ نامے کے بجائے شہریوں سے منہ مانگے دام وصول کیے جانے لگے جبکہ سرکاری نرخ نامے پر عملدرآمد یقینی بنانے کیلئے انتظامیہ کا کچھ پتہ نہیں۔