علی ساہی:رمضان المبارک کے دوران سکیورٹی کو یقینی بنانے کیلئے پنجاب سیف سٹیز اتھارٹی نے صوبہ بھر میں خصوصی اقدامات مکمل کر لیے ہیں۔
حکام کے مطابق پنجاب کے سمارٹ سیف سٹیز سنٹرز میں خصوصی ورچوئل پیٹرولنگ ٹیمیں تشکیل دے دی گئی ہیں جو 24 گھنٹے نگرانی انجام دے رہی ہیں۔
سیف سٹی سسٹم کے تحت 21 سے زائد رمضان و سہولت بازاروں کے 66 کیمروں کو مرکزی نیٹ ورک سے منسلک کر دیا گیا ہے تاکہ خریداروں اور تاجروں کی سکیورٹی کو یقینی بنایا جا سکے۔ اسی طرح بتیس سے زائد پارکس کے 112 کیمرے بھی سیف سٹی سسٹم میں شامل کیے گئے ہیں۔
حکام کے مطابق 163 سے زائد مساجد اور امام بارگاہوں کے 143 کیمرے بھی سیف سٹی نیٹ ورک کا حصہ بن چکے ہیں، جہاں نمازِ تراویح اور دیگر مذہبی اجتماعات کے دوران خصوصی نگرانی کی جا رہی ہے۔ مساجد، امام بارگاہوں اور دیگر اہم عوامی مقامات کی مسلسل مانیٹرنگ جاری ہے۔
سیف سٹی حکام کا کہنا ہے کہ جدید اے آئی بیسڈ سسٹم کے ذریعے ٹریفک سگنلز پر بھکاریوں کی موجودگی پر بھی خصوصی سرویلنس کی جا رہی ہے۔ جدید نظام سگنلز پر کسی بھی مشکوک سرگرمی یا بھکاریوں کی موجودگی کی صورت میں فوری الرٹ جاری کرتا ہے، جس پر متعلقہ ٹیمیں فوری کارروائی عمل میں لاتی ہیں۔
حکام نے شہریوں سے اپیل کی ہے کہ کسی بھی مشکوک سرگرمی کی اطلاع فوری طور پر متعلقہ ہیلپ لائن پر دیں تاکہ رمضان المبارک کے دوران پرامن ماحول کو یقینی بنایا جا سکے۔