راؤ دلشاد:وزیراعلیٰ پنجاب مریم نواز کے صاحبزادے جنید صفدر کی شادی کی تقریبات آج سے شروع ہو رہی ہیں۔
ذرائع کے مطابق جنید صفدر اور شانزے علی روحیل کی مہندی کی تقریب آج رات جاتی امرا میں منعقد ہوگی۔
مہندی کی تقریب میں مہمانوں کی تواضع کے لیے خصوصی اور روایتی پکوان تیار کیے گئے ہیں، جن میں سوپ، چکن دم پورہ، دال گوشت، آلو گوشت، وائٹ رائس، باربی کیو شامل ہیں، جبکہ میٹھے میں گاجر کا حلوہ اور دال کا حلوہ پیش کیا جائے گا۔ شریف فیملی کے کُک روایتی اور دیسی کھانے تیار کریں گے۔
تقریب میں شریف فیملی اور شیخ روحیل اصغر فیملی کے افراد، عزیز و اقارب شرکت کریں گے۔ مہندی کی تقریب میں معروف رقاص وہاب شاہ کو بھی مدعو کیا گیا ہے، جو فنکشن میں پرفارم کریں گے۔ مہندی کی تقریب میں تقریباً 350 مہمانوں کی ضیافت کا اہتمام کیا گیا ہے۔
ذرائع کے مطابق جنید صفدر کی بارات 17 جنوری کو دن ایک بجے لیک سٹی روانہ ہوگی، جس میں شریف فیملی اور قریبی عزیز و اقارب کو مدعو کیا گیا ہے۔ بارات کے موقع پر 400 مہمانوں کے لیے ضیافت کا انتظام کیا گیا ہے۔
جنید صفدر کا ولیمہ 18 جنوری کو جاتی امرا فارمز میں منعقد ہوگا، جس میں 800 مہمانوں کو مدعو کیا گیا ہے۔ ولیمہ کی تقریب میں وزیراعظم شہباز شریف، وفاقی و صوبائی وزرا اور اہم سیاسی رہنماؤں کی شرکت بھی متوقع ہے۔