جنید ریاض :نوکری پر مستقلی، نئے روزگار کے حصول اور بیرون ملک جانے کے خواہشمند امیدوار لاہور بورڈ سے ڈگریوں کی تصدیق میں شدید مشکلات کا سامنا کر رہے ہیں۔
سائلین کا کہنا ہے کہ لاہور بورڈ میں ڈگریوں کی تصدیق کا عمل سست روی کا شکار ہے، جس کے باعث انہیں خوار ہونا پڑ رہا ہے۔
ذرائع کے مطابق مختلف اداروں کی جانب سے تصدیق کے لیے بھیجی گئی ڈگریاں ایک، ایک ماہ سے بورڈ کی جانب سے متعلقہ اداروں کو پارسل نہیں کی جا سکیں۔ امیدواروں کا کہنا ہے کہ ہزاروں روپے فیس جمع کروانے کے باوجود سفارش کی بنیاد پر ڈگریوں کی تصدیق کی جا رہی ہے۔
سائلین نے مزید بتایا کہ آن لائن ڈگری ویریفکیشن سسٹم شروع ہونے کے باوجود ادارے اور امیدوار دونوں تصدیقی عمل میں پریشان ہیں، جبکہ بورڈ کو نظام بہتر بنانے کی ضرورت ہے۔
دوسری جانب بورڈ حکام کا مؤقف ہے کہ ڈگریوں کی تصدیق بروقت کی جا رہی ہے، تاہم سائلین کو سسٹم کی مکمل معلومات نہ ہونے کی وجہ سے پریشانی کا سامنا کرنا پڑتا ہے۔