(ویب ڈیسک) تاریخ ساز کامیابی حاصل کرتے ہوئے  پاکستانی فلم ’دی لیجنڈ آف مولا جٹ‘ 200 کروڑ کے کلب میں شامل ہوگئی۔

تفصیلات کے مطابق بلال لاشاری کی ہدایت کاری میں بننے والی فلم ’دی لیجنڈ آف مولا جٹ‘اس سے قبل 100 کروڑ کے کلب میں شامل ہونے والی پہلی فلم کا اعزاز بھی حاصل کرچکی ہے۔فلم اب تک پوری دنیا میں 9.05 ملین ڈالر کا بزنس کرچکی ہے جس کا پاکستانی روپے میں تخمینہ 200 کروڑ روپے سے زائد ہے۔

 ’دی لیجنڈ آف مولا جٹ‘ کی نمائش دنیا بھر میں جاری ہے اور فلم مزید کامیابی حاصل کرنے کیلئے تیار ہے۔

ایک برطانوی ادارے کی رپورٹ کے مطابق پچھلے چار برسوں کے دوران  یوکے باکس آفس میں ’دی لیجنڈ آف مولا جٹ‘ برصغیر پاک و ہند کی سب سے زیادہ کمائی والی فلم بن چکی ہے۔فلم 13 اکتوبر کو پوری دنیا میں ریلیز کی گئی اور یہ 1979 کی ایک کلاسک پنجابی فلم ’مولا جٹ‘ کا ری میک ہے۔