سٹی42: پنجاب میں فصلوں کی باقیات جلانے (اسٹبل برننگ) کی روک تھام کے لیے ماحولیات تحفظ ایجنسی (ای پی اے) نے مؤثر اور منظم اقدامات کا آغاز, ڈی جی ای پی اے پنجاب ڈاکٹر عمران حامد شیخ کی ہدایت پر خصوصی سرویلنس اسکواڈز تشکیل دے دیے گئے ہیں جو فصلوں کی باقیات جلانے کی نگرانی کریں گے۔
اسٹبل برننگ سیزن کے دوران یہ اسکواڈز پنجاب کی موٹر ویز اور زرعی علاقوں میں مسلسل گشت کریں گے۔ اسکواڈز کو 24 گھنٹے، تین شفٹوں میں مانیٹرنگ کرنے کا ٹاسک سونپا گیا ہے تاکہ کسی بھی خلاف ورزی کو فوری رپورٹ کیا جا سکے۔ایم-11، ایم-3، ایم-2، ایم-4 اور ضلع قصور میں ٹیموں کو تعینات کر دیا گیا ہے، جبکہ دیگر اضلاع میں بھی ٹیموں کو جلد متحرک کیا جائے گا۔
کسانوں کو فصلوں کی باقیات جلانے سے ہونے والے نقصانات اور ماحولیاتی اثرات سے آگاہ کرنے کی بھی ہدایت جاری کی گئی ہے۔ ڈی جی ای پی اے کے مطابق، زیرو ٹالرنس پالیسی پر سختی سے عمل کیا جائے گا، اور کسی قسم کی کوتاہی برداشت نہیں کی جائے گی۔
خلاف ورزی کی صورت میں شہریوں کو ہدایت کی گئی ہے کہ وہ ای پی اے کی ہیلپ لائن 1373 پر شکایات درج کروائیں۔ اسکواڈز کو گشت کے دوران واٹس ایپ لوکیشن آن رکھنے کی ہدایت کی گئی ہے تاکہ ان کی نقل و حرکت کی نگرانی ممکن ہو۔
تمام ڈپٹی کمشنرز کو ان اسکواڈز کے ساتھ مکمل تعاون کی ہدایت جاری کی گئی ہے، جبکہ اسسٹنٹ ڈائریکٹر عثمان ظفر کو اسٹبل برننگ کا فوکل پرسن مقرر کیا گیا ہے۔