سٹی 42 : وفاقی وزیر اطلاعات عطا اللہ تارڑ نے کہا ہے کہ محمد نواز شریف کے خاندان نے ملک میں صنعتی ترقی کو فروغ دیا، ملک کے کونے کونے میں ترقیاتی کاموں کا سہرا نواز شریف کو جاتا ہے، محمد نواز شریف نے ملک میں خدمت کی سیاست کا آغاز کیا، ملکی ترقی کے ہر منصوبے کی تختی پر نواز شریف کا نام لکھا ہے۔
ان خیالات کا اظہار عطاء اللہ تارڑ نے سینئر صحافی محمد نواز رضا کی کتاب ”مرد آہن محمد نواز شریف“ کی تقریب رونمائی سے خطاب کے دوران کیا، کہا کہ آج سینئر صحافیوں کے درمیان موجود ہوں جنہوں نے اپنے قلم کے ذریعے پاکستان کی کئی دہائیوں خدمت کی ہے، صحافت اور صحافیوں سے تعلق بہت پرانا ہے۔ انہوں نے کہا کہ محمد نواز رضا کا صحافتی کیریئر کئی دہائیوں پر مشتمل ہے۔ مرحوم عرفان صدیقی نے مثبت صحافت کے فروغ میں اہم کردار ادا کیا ۔
وزیر اطلاعات نے کہا کہ محمد نواز شریف نے ملک میں خدمت کی سیاست کا آغاز کیا، ملکی ترقی کے ہر منصوبے کی تختی پر نواز شریف کا نام لکھا ہے۔ راولپنڈی انسٹیٹیوٹ آف کارڈیالوجی کا سنگ بنیاد نواز شریف کے دور میں رکھا گیا۔ انہوں نے کہا کہ محمد نواز شریف اور محمد شہباز شریف نے ملک کو ترقی کی راہ پر گامزن کیا، وزیراعظم کی قیادت میں ملکی معیشت کو استحکام ملا۔
پی ٹی آئی نے ملک اور معیشت کو شدید نقصان پہنچایا، تبدیلی کا نعرہ لگا کر ملک میں تباہی لائی گئی، سازش کے ذریعے نوجوان نسل کو گمراہ کرنے کی کوشش کی گئی۔ انہوں نے کہا کہ پی ٹی آئی نے کردار کشی اور نفرت کی سیاست کو فروغ دیا۔نفرت اور تقسیم کی سیاست کرنے والوں نے 12 سال میں خیبر پختونخوا کو تباہ کر دیا، پی ٹی آئی کے پاس اپنی کارکردگی بتانے کے لئے کچھ نہیں، 12 سال میں خیبر پختونخوا میں ایک بھی پی کے ایل آئی جیسا ہسپتال نہ بن سکا۔
عطاء اللہ تارڑ نے کہا کہ آج عالمی ادارے ملکی معیشت میں بہتری کا اعتراف کر رہے ہیں۔ انہوں نے کہا کہ عوام کو ریلیف کی فراہمی محمد نواز شریف کا نصب العین ہے، محمد نواز شریف نے خطے میں سب سے پہلے موٹر ویز متعارف کرائیں، 2013ء کے الیکشن بانی پی ٹی آئی کرین سے گر کر زخمی ہوئے تو محمد نواز شریف نے فورا' میٹنگ بلائی، محمد نواز شریف نے فوری طور پر اظہار ہمدردی کے لئے جلسے منسوخ کئے، سیاست کے اندر وضع داری ہوتی ہے، محمد نواز شریف نے ملک میں رواداری کی سیاست کو پروان چڑھایا۔