ویب ڈیسک : سندھ کے نوجوانوں کیلئے یوتھ کارڈ متعارف کروانے کی تیاریاں شروع کردی گئیں، سندھ حکومت نے محکمہ کھیل کو طریقہ کار تیار کرنے کی ہدایت کردی ۔
وزیر کھیل و امور نوجوانان سردار محمد بخش مہر کی زیرِ صدارت سندھ سیکریٹریٹ میں یوتھ کارڈ متعارف کروانے سے متعلق اہم اجلاس کا انعقاد کیا گیا جس میں سندھ حکومت نے صوبے کے نوجوانوں کیلئے یوتھ کارڈ متعارف کروانے کی تیاریاں شروع کرتے ہوئے محکمہ کھیل کو طریقہ کار تیار کرنے کی ہدایت کی ہے۔
اجلاس میں سیکریٹری کھیل منور علی مہیسر، ڈائریکٹر اسد اسحاق، چیف انجنیئر محمد اسلم مہر سمیت دیگر افسران نے شرکت کی۔ صوبے کے نوجوانوں کیلئے یوتھ کارڈ کی تیاریوں پر تفصیلی بریفنگ دی گئی۔صوبائی وزیر کھیل و امور نوجوانان نے سیکریٹری کھیل کو ہدایت دیتے ہوئے کہا کہ یوتھ کارڈکیلئے ایسا طریقہ کار مرتب کیا جائے جس سے صوبے کے نوجوان طبقے کو زیادہ سے زیادہ فائدہ حاصل ہو ۔
سردار محمد بخش مہر نے کہا کہ چیئرمین پاکستان پیپلز پارٹی بلاول بھٹو زرداری کی خصوصی ہدایت پر رواں سال جون سے قبل سندھ یوتھ کارڈ متعارف کروانے کا پلان ہے۔اس کے ذریعے نوجوانوں کو تعلیم، ہنر، روزگار، اسکالرشپ اور اسپورٹس کی سہولیات فراہم کی جائیں گی۔