سٹی42: وفاقی وزیرداخلہ محسن نقوی نے پشاور میں فیڈرل کانسٹیبلری (ایف سی) کے ہیڈکوارٹر کا دورہ کیا، جہاں انہوں نے ایف سی ہسپتال میں زیر علاج زخمی سپاہیوں عدنان اور امتیاز کی عیادت کی اور انہیں علاج کی بہترین سہولیات فراہم کرنے کی یقین دہانی کرائی۔
پشاور میں وفاقی وزیرداخلہ محسن نقوی نے فیڈرل کانسٹیبلری کے ہیڈکوارٹر کا دورہ کیا۔ اس موقع پر انہوں نے ایف سی کے ہسپتال میں زیر علاج زخمی سپاہی عدنان اور سپاہی امتیاز کی عیادت کی۔
حکام کے مطابق دونوں سپاہی فتنہ الخوارج کے حملے کو ناکام بنانے کے دوران زخمی ہوئے تھے۔ وزیرداخلہ نے زخمی اہلکاروں کی خیریت دریافت کی اور ان کے علاج معالجے کے حوالے سے تفصیلی بریفنگ لی۔
محسن نقوی نے متعلقہ حکام کو ہدایت کی کہ زخمی سپاہیوں کو علاج کی بہترین اور فوری سہولیات فراہم کی جائیں۔ انہوں نے سپاہی عدنان اور سپاہی امتیاز کے بلند حوصلے، عزم اور جذبے کو سراہتے ہوئے کہا کہ قوم اپنے بہادر جوانوں کی قربانیوں کو قدر کی نگاہ سے دیکھتی ہے۔