بسام سلطان: محکمہ بلدیات پنجاب میں بدعنوانی کا سنگین معاملہ سامنے آیا ہے جس میں فیلڈ فارمیشنز کے ذمہ داران سے اعلیٰ حکام کے نام پر بھتے کی مبینہ کالز کیے جانے کا انکشاف ہوا ہے۔
محکمہ بلدیات نے صوبے بھر کے ایڈمنسٹریٹرز اور چیف آفیسرز کو ایک اہم مراسلہ جاری کیا ہے جس میں خبردار کیا گیا ہے کہ سروس سے متعلق مسائل کے حل کی آڑ میں افسران کو جعلی کالز کے ذریعے مالی مطالبات کیے جا رہے ہیں۔
مراسلے میں بتایا گیا ہے کہ ماضی میں بھی ایسے بھتہ خوری کے واقعات سامنے آ چکے ہیں جن پر تشویش کا اظہار کیا گیا ہے۔
محکمہ بلدیات نے تمام افسران کو ہدایت کی ہے کہ وہ ایسی کالز پر ہرگز کان نہ دھریں اور کسی بھی مشکوک یا جعلی کال کی فوری اطلاع محکمہ کو دیں۔