اقصی شاہد:کراچی کے جناح انٹرنیشنل ایئرپورٹ پر فلائٹ آپریشن متاثر ہونے کے باعث اڑانوں کا نظام الٹ پلٹ ہو گیا ہے، جس کے نتیجے میں مختلف اندرون و بیرون ملک جانے والی 5 پروازیں منسوخ کر دی گئیں۔

ایئرپورٹ ذرائع کے مطابق کراچی سے کوالالمپور جانے والی ایئرپلن کی پرواز ڈی سیون 109منسوخ کر دی گئی ہے، جبکہ کراچی سے بیجنگ جانے والی ایئر چائنہ کی پرواز سی اے 946 بھی آپریشنل وجوہات کے باعث منسوخ ہوئی۔

اسی طرح کراچی سے لاہور جانے والی ایئرسیال کی دو پروازیں پی ایف 141 اور پی ایف 14 منسوخ کر دی گئیں، جبکہ کراچی سے اسلام آباد جانے والی ایئرسیال کی پرواز پی ایف 123 بھی آپریشن سے نکال دی گئی ہے۔

ایئرپورٹ انتظامیہ کا کہنا تھا کہ مسافروں کو پروازوں کی منسوخی کے بارے میں آگاہ کر دیا گیا ہے اور متبادل انتظامات پر کام جاری ہے۔

مسافروں نے اچانک منسوخی پر پریشانی کا اظہار کیا ہے، جبکہ ایئرلائنز کی جانب سے تاخیر اور منسوخی کی وجوہات سے متعلق مزید معلومات فراہم کی جا رہی ہیں۔