(وقاص عظیم )پٹرولیم لیوی کے حوالے سے وفاقی وزارت خزانہ کی دستاویزات میں تفصیلات سامنے آگئیں۔
شہری پیٹرولیم لیوی کے مسلسل بڑھتے ہوئے بوجھ کی زد میں ہیں اورمالی سال کی پہلی ششماہی میں سب سےزیادہ لیوی وصولی کا انکشاف ہواہے،وفاقی وزارت خزانہ کی تازہ دستاویزات کے مطابق مالی سال 2025-26 کی پہلی ششماہی جولائی تا دسمبر 2025میں پیٹرولیم لیوی کی وصولی 822 ارب 93 کروڑ روپے تک پہنچ گئی جو ملک کی تاریخ میں کسی بھی ششماہی میں سب سے زیادہ ہے۔
دستاویزکے مطابق سالانہ بنیادپرجولائی تا دسمبر لیوی کی وصولی میں 273 ارب51 کروڑروپے کا اضافہ ہوا،گزشتہ سال جولائی تا دسمبر پیٹرولیم لیوی کی وصولی 549 ارب 41 کروڑ روپے تھی۔
دستاویزکے مطابق رواں مالی سال کے لیے پیٹرولیم لیوی وصولی کا ہدف1468 ارب 39 کروڑ 50 لاکھ روپے مقرر ہے، گزشتہ مالی سال پیٹرولیم لیوی کی وصولی 1220ارب21 کروڑ 30 لاکھ تھی، مالی سال2023۔24میں پیٹرولیم لیوی کی مد میں وصولی ایک ہزار 19 ارب روپے تھی جبکہ مالی سال2022۔23میں پیٹرولیم لیوی کی مد میں وصولی580ارب روپے تھی۔