ویب ڈیسک:تحریک انصاف ممنوعہ فنڈنگ ضبطگی کیس میں الیکشن کمیشن نے پی ٹی آئی کو جواب جمع کرانے کیلئے آخری موقع دے دیا۔

تفصیلات کے مطابق چیف الیکشن کمشنر کی زیر صدارت چار رکنی کمیشن نے تحر یک انصاف ممنوعہ فنڈنگ ضبطگی کیس کی سماعت کی۔ پی ٹی آئی کی جانب سے وکیل شاہ خاور عدالت میں پیش ہوئے اور عدم حاضری پر وضاحت دیتے ہوئے کہا کہ گزشتہ سماعت پر سپریم کورٹ میں مصروف تھا۔

وکیل پی ٹی آئی نے بتایا کہ بیرون ملک سے بعض دستاویزات ابھی تک نہیں ملیں، تمام دستاویزات موصول ہونے پر ہی جواب جمع کروایا جائے گا۔شاہ خاور نے مؤقف اپنایا کہ سمندر پار پاکستانیوں کے نائیکوپ اور دیگر تفصیلات کا انتظار ہے۔

جس پر ممبر کے پی نے استفسار کیا ممنوعہ فنڈنگ کیس کتنا عرصہ چلا تھا؟ تو شاہ خاور نے بتایا ممنوعہ فنڈنگ کیس آٹھ سال تک چلا تھا۔چیف الیکشن کمشنر نے ریمارکس دیے کیا اس کیس کو بھی آٹھ سال چلانا ہے؟ شاہ خاور کی جانب سے دو ہفتے کا وقت دینے کی استدعا کی گئی۔جس پر چیف الیکشن کمشنر نے واضح کہا یقینی بنایا جائے کہ آخری مرتبہ وقت لیا جا رہا ہے۔

الیکشن کمیشن نے پی ٹی آئی کو جواب جمع کرانے کیلئے آخری موقع دیتے ہوئے کیس کی مزید سماعت 19 ستمبر تک ملتوی کردی۔