کلیم اختر:ایف بی آر میں سرپلس ملازمین کی ایڈجسٹمنٹ کا باضابطہ نوٹیفکیشن جاری کر دیا گیا ہے, جس  کے تحت مختلف وزارتوں سے فاضل قرار  دیئے گئے ملازمین کو ایف بی آر میں ضم کرنے کا فیصلہ کیا گیا ہے.

 ذرائع کے مطابق جس پر اسٹیبلشمنٹ ڈویژن کی ہدایات کے تحت عملدرآمد کرتے ہوئے ایف بی آر نے باقاعدہ آفس آرڈر جاری کر دیا ہے۔

نوٹیفکیشن کے مطابق نیشنل فوڈ سکیورٹی اینڈ ریسرچ وزارت سے تعلق رکھنے والے افسران اور اہلکاروں کو ایف بی آر منتقل کیا گیا ہے، جن میں گریڈ 16 کے افسران کے علاوہ 11 یو ڈی سی، ایل ڈی سی اور نائب قاصد بھی شامل ہیں۔ منتقل ہونے والے ملازمین کو ان لینڈ ریونیو کی فیلڈ فارمیشنز میں خالی آسامیوں پر تعینات کیا جائے گا اور ان کی پوسٹنگ مختلف ٹیکس دفاتر میں کی جائے گی۔

ایف بی آر حکام کا کہنا ہے کہ سرپلس سٹاف کی ایڈجسٹمنٹ سے انتظامی کارکردگی بہتر بنانے میں مدد ملے گی۔ تمام تعیناتیاں اسٹیبلشمنٹ ڈویژن کے اس فیصلے کے تحت کی گئی ہیں جس کا مقصد مختلف اداروں میں سرپلس ملازمین کو مؤثر انداز میں ضم کرنا ہے۔