سٹی42: وزیر داخلہ محسن نقوی نے کوہاٹ کے علاقے میں فتنہ الخوارج کے 2 دہشت گردوں کو جہنم واصل کرنے پر خیبرپختونخوا پولیس کو خراج تحسین پیش کیا ہے اور کہا ہے کہ پولیس نے بروقت کارروائی کرکے خوارجی دہشتگردوں کو عبرتناک انجام تک پہنچایا۔
محسن نقوی نے اس بات کی تعریف کی کہ پولیس نے بہادری کے ساتھ خوارجی دہشتگردوں کا مقابلہ کیا اور دہشتگردوں کے مذموم عزائم کو ناکام بنایا۔ انہوں نے کہا کہ خیبرپختونخوا پولیس دہشتگردی کے خلاف جنگ میں فرنٹ لائن پر ہے۔
محسن نقوی نے دہشتگردوں کی چھپ کر کی گئی فائرنگ سے جام شہادت نوش کرنے والے سب انسپکٹر طاہر نواز اورکانسٹیبل محمد علی کو خراج عقیدت پیش کیا اور شہید سب انسپکٹر طاہر نواز اور کانسٹیبل محمد علی کے لواحقین سے دلی ہمدردی اور تعزیت کا اظہار کیا۔ انہوں نے کہا، شہداء کی عظیم قربانیوں کو ہمیشہ یاد رکھا جائے گا۔
وزیر داخلہ نے کہا، خیبرپختونخوا پولیس کے بہادر سپوتوں نے دہشتگردی کے خلاف جنگ میں لازوال قربانیاں دی ہیں۔