سٹی42: احتجاج کرنیوالے جی سی یونیورسٹی کےملازمین نوکری سے برطرف کردیا گیا ہے۔

لاہور ہائیکورٹ میں جی سی یونیورسٹی کے ملازمین کی برطرفی کے خلاف کیس کی سماعت ہوئی، جس میں یونیورسٹی انتظامیہ کے خلاف توہین عدالت کی درخواست دائر کی گئی ہے۔ درخواست گزار، جن میں خالق حسین سمیت دیگر شامل ہیں، اُن کا مؤقف ہے کہ اپنے جائز مطالبات کے حق میں احتجاج کرنے پر انہیں یونیورسٹی انتظامیہ نے نوکری سے برطرف کیا اور عدالتی احکامات کے باوجود انہیں بحال نہیں کیا جا رہا جو واضح طور پر توہین عدالت کے زمرے میں آتا ہے۔

جسٹس ساجدمحمود سیٹھی نے وی سی گورنمنٹ کالج یونیورسٹی پروفیسر ڈاکٹر محمد عمر چوہدری اور رجسٹرار جی سی یونیورسٹی کو لاہور ہائیکورٹ پیش ہونے کا حکم دیا اور آئندہ سماعت پر افسران کو ذاتی حیثیت میں پیش ہونے کا بھی کہا۔

 عدالت نے واضح کیا کہ عدالتی حکم پر عمل نہ کرنے کی صورت میں آئندہ سماعت پر افسران کے خلاف کارروائی کی جائے گی۔ درخواست گزار کی استدعا ہے کہ یونیورسٹی انتظامیہ کے خلاف توہین عدالت کی کارروائی عمل میں لائی جائے۔