ویب ڈیسک: عمان کے مرکزی تیل برآمدی مرکز مینا الفحل میں دھماکے کے واقعے کے بعد خام تیل کی لوڈنگ عارضی طور پر معطل کر دی گئی، جس سے عالمی توانائی سپلائی کے حوالے سے خدشات میں اضافہ ہو گیا ہے۔

غیر ملکی میڈیا رپورٹس کے مطابق دو باخبر ذرائع نے انکشاف کیا ہے کہ دھماکا ٹرمینل کے سنگل بوائے مورنگ (SBM) 1 اور SBM 2 کے درمیان پیش آیا۔ ابتدائی اطلاعات میں واقعے کی ممکنہ وجہ ڈرون حملہ قرار دی جا رہی ہے، تاہم حکام نے ابھی تک اس حوالے سے کوئی باضابطہ تصدیق جاری نہیں کی۔

ذرائع کا کہنا ہے کہ واقعے کے فوراً بعد آئل لوڈنگ آپریشنز روک دیے گئے، جبکہ متعدد سپر ٹینکرز کو بندرگاہ کے باہر انتظار کرتے دیکھا گیا۔ اس صورتحال نے تیل کی ترسیل اور سپلائی چین کے تسلسل سے متعلق سوالات کھڑے کر دیے ہیں۔

تاحال عمانی حکام یا ٹرمینل انتظامیہ کی جانب سے کوئی سرکاری بیان سامنے نہیں آیا۔ اطلاعات کے مطابق واقعہ دفتری اوقات ختم ہونے کے بعد پیش آیا، جس کے باعث تفصیلات محدود ہیں۔

دوسری جانب مشرق وسطیٰ میں جاری جغرافیائی و سکیورٹی کشیدگی کے تناظر میں اس واقعے کو غیر معمولی اہمیت دی جا رہی ہے۔ ماہرین کے مطابق توانائی تنصیبات پر کسی بھی قسم کا حملہ عالمی تیل منڈیوں میں بے چینی پیدا کر سکتا ہے اور قیمتوں پر بھی اثر انداز ہو سکتا ہے۔

رپورٹس میں بتایا گیا ہے کہ حالیہ عرصے کے دوران خطے میں بحری راستوں اور توانائی کے بنیادی ڈھانچے کو نشانہ بنانے کے الزامات اور واقعات میں اضافہ دیکھنے میں آیا ہے، جس سے عالمی توانائی تجارت کو درپیش خطرات مزید نمایاں ہو گئے ہیں۔