سٹی 42 : پی ڈی ایم اے پنجاب کے ڈائریکٹر جنرل عرفان علی کاٹھیا نے کہا ہے کہ ماحولیات کا تحفظ ہم سب کی قومی زمہ داری ہے ۔ 

عالمی یوم ماحولیات کے دن کی مناسبت سے ڈی جی عرفان علی کاٹھیا نے اپنے پیغام میں کہا کہ آج پاکستان سمیت دنیا بھر میں ماحولیات کے تحفظ کا عالمی دن منایا جا رہا ہے، ماحولیات کا عالمی دن ہر سال ماحولیاتی آگاہی اور صفائی ستھرائی کیلئے منایا جاتا ہے ۔ انہوں نے کہا کہ وزیر اعلیٰ پنجاب کی قیادت میں زیرو پلاسٹک و زیرو پلوشن ڈے منایا جا رہا ہے، دور جدید میں ماحولیات کی آلودگی میں عالمی سطح پر اضافہ ہوا ہے۔ 

عرفان علی کاٹھیا نے کہا کہ پاکستان موسمیاتی تبدیلیوں کے باعث متاثر ممالک میں شامل ہے، پنجاب حکومت ماحولیات کے تحفظ کیلئے انقلابی اقدامات کر رہی ہے شہریوں کو بھی ساتھ دینا ہو گا، بحیثیت شہری ہمیں ماحولیات کے تحفظ کیلئے حکومتی اقدامات پر عمل پیرا ہونا ہے۔انہوں نے کہاکہ گھر گلی اور محلوں کو صاف رکھیں گے تو ہمارے شہر صاف ستھرے ہو ں گے ۔ 

انہوں نے مزید کہا کہ عالمی یوم ماحولیات منانے کا مقصد ماحولیات کا تحفظ اور جانداروں کو قدرتی ماحول کی فراہمی ہے، انسان اور ماحولیات کا تحفظ ضروری ہے قدرتی ماحول کے بغیر زندگی کا وجود ناممکن ہے ۔