وقاص عظیم:وزیر خزانہ محمد اورنگزیب نے دسمبر 2025 میں فیڈرل بورڈ آف ریونیو (ایف بی آر) کی تاریخی ٹیکس وصولی کا اعلان کرتے ہوئے بتایا کہ ماہانہ ہدف کا 99 فیصد حاصل کیا گیا۔
دسمبر میں ایف بی آر نے مجموعی طور پر 1427 ارب روپے ٹیکس وصول کیے جو کسی بھی دسمبر میں اب تک کی سب سے زیادہ رقم ہے۔ نومبر کے مقابلے دسمبر میں ٹیکس وصولی میں 59 فیصد اضافہ ہوا۔
وزیر خزانہ نے کہا کہ انکم ٹیکس وصولی میں 107 فیصد اضافہ ریکارڈ کیا گیا اور یہ 831 ارب روپے تک پہنچ گئی جبکہ سیلز ٹیکس میں 25 فیصد اضافہ ہوا۔ فیڈرل ایکسائز ڈیوٹی میں 6 فیصد اضافہ اور کسٹمز ڈیوٹی کی وصولی 118 ارب روپے سے تجاوز کر گئی۔
محمد اورنگزیب نے ایف بی آر کی فیلڈ فارمیشنز کی کارکردگی کو سراہا اور ٹیکس نیٹ کو مزید وسیع کرنے اور بہتر ٹیکس تعمیل کے ذریعے رسمی شعبے پر بوجھ کم کرنے پر زور دیا۔