ویب ڈیسک:نیشنل سائبر کرائم انویسٹی گیشن ایجنسی (این سی سی آئی اے) نے صارفین کے لیے نئے سال کی پہلی سائبر سیکیورٹی ایڈوائزری جاری کر دی ہے، جس میں آن لائن فراڈ اور ہیکنگ سے بچاؤ کے لیے احتیاطی تدابیر پر زور دیا گیا ہے۔ ایجنسی نے شہریوں کو خبردار کرتے ہوئے کہا ہے کہ سنہری اصول یاد رکھیں، کلک کرنے سے پہلے ضرور سوچیں، کیونکہ یہی احتیاط بڑے مالی اور ڈیجیٹل نقصان سے بچا سکتی ہے۔
این سی سی آئی اے کے مطابق آج کے دور میں پڑھے لکھے اور باشعور افراد بھی سائبر جرائم کا آسانی سے شکار ہو جاتے ہیں، کیونکہ ہیکرز اب صرف تکنیکی طریقے استعمال نہیں کرتے بلکہ جذبات، لالچ اور خوف کو ہتھیار بنا کر لوگوں سے ذاتی معلومات حاصل کر لیتے ہیں۔
ایڈوائزری میں کہا گیا ہے کہ صارفین اپنے تمام آن لائن اکاؤنٹس کے لیے مضبوط پاسورڈز کا انتخاب کریں اور پاسورڈ میں اپنا نام، تاریخِ پیدائش یا سادہ اعداد استعمال کرنے سے گریز کریں۔ اس کے ساتھ ساتھ تمام اکاؤنٹس پر ٹو فیکٹر آتھنٹیکیشن (ٹو ایف اے) فعال کرنے کی ہدایت کی گئی ہے، جسے ڈیجیٹل سیکیورٹی کے لیے ایک اضافی اور مضبوط حفاظتی حصار قرار دیا گیا ہے۔
ایجنسی نے شہریوں کو متنبہ کیا ہے کہ کسی بھی انجان لنک پر کلک نہ کریں اور نہ ہی فون یا میسج کے ذریعے کسی کو اپنا ون ٹائم پاسورڈ (او ٹی پی) بتائیں۔ ایڈوائزری کے مطابق اگر کوئی پیغام غیر معمولی انعام یا فائدے کا لالچ دے تو اسے فراڈ سمجھا جائے۔