(عمر اسلم) پاکستان مسلم لیگ (ن) کے صدر شہبازشریف نے منی بجٹ کو مسترد کر دیا، منی بجٹ لانے کے اعلان سے ثابت ہوگیا کہ قومی بجٹ کے موقع پر حکومت نے قوم اور کاروباری برادری سے جھوٹ بولا، منی بجٹ کا ڈٹ کر مقابلہ کریں گے، منظور نہیں ہونے دیں گے۔

صدر مسلم لیگ(ن) میاں شہباز شریف نے کہا ہے کہ منی بجٹ لانے والے کہتے تھے کہ کوئی منی بجٹ نہیں آئے گا، عمران نیازی نے ایک اور یوٹرن لیا ہے, یہ منی بجٹ نہیں، معاشی تباہی، مہنگائی کا سیاہ طوفان ہے، جو پاکستان کی معیشت، صنعت، روزگار اجاڑ دے گا, منی بجٹ قومی معیشت کے تابوت میں آخری کیل ثابت ہوگا۔

 انہوں نے کہا کہ نئی قانون سازی سے حکومت پاکستان میں آئی ایم ایف کی ٹیکس کلکٹر بن جائے گی، وفاقی حکومت کا کردار محض آئی ایم ایف کے ٹیکس جمع کرنے تک محدود ہوکر رہ جائے گا اور پاکستان کی معیشت براہ راست عالمی مالیاتی ادارہ کنٹرول کرے گا۔

 شہباز شریف نے کہا کہ گھی 10 روپے مہنگا ہوکر360 روپے کلو ہوگیا، آٹے، چینی کے بعد گھی مسلسل مہنگا ہو رہا ہے, ایک سال میں بجلی 73 روپے، پٹرول41 اور ڈیزل 37 فیصد مہنگا ہوا جبکہ عالمی منڈی میں تیل کی قیمت میں کمی کے باوجود عوام کو ریلیف نہیں دیا گیا۔