(علی رامے) پنجاب حکومت کی سستے گھروں کی سکیم، محکمہ ہاؤسنگ پنجاب نے 14 لاکھ روپے میں 3 مرلے کا گھر دینے کی شرائط طے کرلیں، ماہانہ 60 ہزار روپے سے کم آمدن والے شہری 12 ہزارکی قسط پر گھر لے سکیں گے۔

ذرائع کے مطابق کم آمدن والے افراد کے لیے حکومت پنجاب سستا گھر سکیم شروع کر رہی ہے، جس سے ایسے شہری  جن کی ماہانہ ذرائع آمدن 60 ہزار روپے سے کم ہے ان کو یہ گھر بنا کے دیئے جائیں گے۔

حکومت نے ابتدائی طور پر کم ذرائع آمدن والے افراد کو گھر دینے کے لیے چند شرائط بھی تیار کی ہیں، جس میں شہری کی آمدن تو مشروط ہے ہی لیکن ساتھ ہی جس تحصیل میں ہاؤسنگ سکیم ہوگی اسی تحصیل کے افراد کو گھر ملے گا، کم آمدن والے افراد کو بینک سے 10 لاکھ روپے کا قرض بھی آسانی سے مل سکے گا، شہری کا کسی بھی اور سرکاری ہاؤسنگ سکیم میں کوئی پراپرٹی نہ ہونا لازم ہے، جبکہ ماہانہ ذرائع آمدن، بینک اکاؤنٹ کی تفصیلات، موٹر سائیکل کی رجسٹریشن کی دستاویزات دینا ہوں گی۔ 

دوسری جانب بارہ ایکٹر سے کم زرعی رقبے والے کاشتکار بھی ہاؤسنگ سکیم میں گھر لینے کے اہل ہونگے، گھر دس سال کے لیے کرائے پربھی نہیں دیا جاسکے گا، شہر میں یہ سکیم رائے ونڈ تحصیل میں بنے گی، سکیم نیا پاکستان ہاؤسنگ اپارٹمنٹ سے الگ ہوگی، ڈاؤن پیمنٹ کی ادائیگی حکومت پنجاب خود کرے گی۔