ویب ڈیسک : مالٹا میں چھٹیاں منانے والے ایک برٹش پاکستانی باپ اور بیٹا افسوسناک حادثے میں سمندر میں ڈوب کر جاں بحق ہو گئے۔ 

اطلاعات کے مطابق اسلام آباد سے تعلق رکھنے والے راجا قدوس بنارس اپنے اہلِ خانہ کے ہمراہ مالٹا میں تعطیلات گزارنے گئے تھے۔ وہ اپنے کمسن بیٹے کے ساتھ ساحلِ سمندر پر نہا رہے تھے کہ اچانک تیز لہروں نے بچے کو بہا لیا۔

بیٹے کو بچانے کی کوشش میں راجا قدوس بنارس فوراً سمندر میں کود گئے، تاہم وہ خود بھی پانی کے زور دار بہاؤ میں پھنس گئے اور واپس نہ آ سکے۔ واقعے کی اطلاع ملنے پر مقامی ریسکیو ٹیموں نے فوری سرچ آپریشن شروع کیا، جس کے بعد کچھ دیر میں دونوں باپ بیٹے کی لاشیں سمندر سے نکال کر قریبی اسپتال منتقل کر دی گئیں۔

پولیس کے مطابق ابتدائی شواہد سے ظاہر ہوتا ہے کہ یہ واقعہ محض ایک افسوسناک حادثہ تھا اور اس میں کسی قسم کی مجرمانہ کارروائی کا کوئی پہلو سامنے نہیں آیا۔

اہلِ خانہ نے پاکستانی ہائی کمیشن سے لاشوں کی وطن منتقلی میں معاونت کی درخواست کر دی ہے۔ دوسری جانب اسلام آباد میں مرحومین کے رشتہ دار اور دوست احباب شدید غم و صدمے میں مبتلا ہیں۔ علاقے میں سوگ کی فضا ہے اور مقامی سطح پر تعزیت کے لیے آنے والوں کا تانتا بندھا ہوا ہے۔