سٹی 42 : پاکستان افریقہ اکنامک کونسل (PAEC) نے محمد مرتضیٰ نور کو اسلام آباد ریجن کے لیے جنرل سیکرٹری مقرر کر دیا ۔
یہ اعلان پی اے ای سی کے بورڈ آف ڈائریکٹرز اور سینٹرل ایگزیکٹو کمیٹی کی جانب سے کیا گیاہے جنہوں نے بین الاقوامی تعاون کے فروغ کے لیے ان کی خدمات، قیادت اور مستقل کاوشوں کو سراہاہے۔
محمد مرتضیٰ نور اپنے نئے منصب میں ادارے کے انتظامی امور، ممبرشپ ڈویلپمنٹ،ایونٹ کوآرڈینیشن اور اسٹریٹیجک رابطہ کاری کی نگرانی کریں گے، پی اے ای سی کی قیادت نے ان پر اظہارِ اعتماد کرتے ہوئے کہاہے کہ ان کی فعال قیادت کونسل کی رسائی میں مزید اضافہ کرے گی اور پاکستان اور افریقہ کے درمیان اقتصادی و ادارہ جاتی روابط کو مضبوط بنائے گی۔
اعلیٰ تعلیم،ڈویلپمنٹ اور بین الاقوامی تعاون کے شعبوں میں 25 سال سے زائد تجربے کے حامل محمد مرتضیٰ نور تعلیمی نیٹ ورکنگ، نوجوانوں کی ترقی اور پالیسی ایڈووکیسی کے حوالے سے نمایاں مقام رکھتے ہیں،وہ آئی یو سی پی ایس ایس کے نیشنل کوآرڈینیٹر ہیں جو سرکاری و نجی جامعات کا سب سے بڑا نیٹ ورک ہے،اس کے علاوہ ایسوسی ایشن آف پرائیویٹ سیکٹر یونیورسٹیز پاکستان (APSUP) کے ایگزیکٹو ڈائریکٹر اور اکیڈمیا انڈسٹری لنکیجز فورم کے سینئر نائب صدر بھی ہیں، وہ انٹرنیشنل سٹوڈنٹس کنونشن اینڈ ایکسپو کے بانی بھی ہیں جو پاکستان کا سب سے بڑا طلبہ پر مبنی پلیٹ فارم ہے۔
انہوں نے عالمی تعلیمی سفارتکاری میں بھی اہم کردار ادا کیا ہے، جن میں او آئی سی,کامسٹیک میں ایڈوائزر (لنکیجز و میڈیا)، او آئی سی کامسٹیک کنسورشیم آف ایکسیلینس کے کوآرڈینیٹر اور گلوبل ہائر ایجوکیشن لیڈرشپ اکیڈمی کے کنٹری کوآرڈینیٹر کے طور پر بھی خدمات شامل ہیں۔ایچ ای سی، لمز، یو این ڈی پی اور دیگر قومی و بین الاقوامی اداروں کے ساتھ ان کا کام حکمرانی، استعداد کار میں اضافے اور انٹر یونیورسٹی کولیبریشن کے فروغ کا باعث بنا ہے، وہ بطور کالم نگار اور نوجوانوں کے حقوق کے علمبردار بھی پہچانے جاتے ہیں اور امن ایوارڈ، سول ایجوکیشن ایوارڈ اور دیگر متعدد قومی و بین الاقوامی اعزازات حاصل کر چکے ہیں، انہوں نے مختلف عالمی فورمز پر پاکستان کی نمائندگی بھی کی ہے۔
پی اے ای سی کی قیادت نے محمد مرتضیٰ نور کے لیے نیک خواہشات کا اظہار کرتے ہوئے یقین ظاہر کیا ہے کہ وہ پاکستان افریقہ تعاون کے فروغ میں مؤثر کردار ادا کریں گے اور علاقائی روابط کے حوالے سے کونسل کے وژن کو مزید آگے بڑھائیں گے۔