سٹی 42 : وزیر خارجہ اسحاق ڈار نے اسپین کے وزیر خارجہ و یورپی یونین و تعاون کے وزیر ہوزے مینویل البریز سے رابطہ کیا، اسحاق ڈار نے انہیں حالیہ علاقائی پیش رفت سے آگاہ کیا۔ 

 ترجمان دفتر خارجہ کے مطابق اسحاق ڈار نے واضح کیا کہ بھارتی پروپیگنڈا اور پاکستان کے خلاف غیر قانونی یکطرفہ اقدامات، اور سندھ طاس معاہدے کو التواء میں رکھنا بین الاقوامی قانون کی واضح خلاف ورزی ہے, اسحاق ڈار نے علاقائی امن و سلامتی کے لیے پاکستان کے عزم کا اعادہ کیا، انہوں نے آزاد اور شفاف تحقیقات کے لیے پاکستان کی تیاری سے بھی آگاہ کیا۔ 

 ترجمان دفتر خارجہ کا کہنا ہے کہ ہسپانوی وزیر خارجہ نے معاملے کے پرامن حل کے لیے پاکستان کی خواہش کو سراہا, انہوں نے شفاف تحقیقات کے لیے اس کی تجویز کا خیرمقدم کیا۔ دونوں راہنماؤں نے دوطرفہ اور کثیرالجہتی دونوں فورمز پر تعاون کو مضبوط بنانے کے اپنے عزم کا اعادہ کیا ۔