علی رامے:  پنجاب میں ہاؤسنگ سوسائٹیز کے لیے ٹیکس میں بڑی رعایت کی تجویز سامنے آ گئی ہے۔

ذرائع کے مطابق ہاؤسنگ سوسائٹی کی کمپنی میں شامل ہونے پر عائد ٹیکس ختم کرنے کی سفارش کی گئی ہے۔
بورڈ آف ریونیو نے ہاؤسنگ سوسائٹیز پر جائیداد کی ملکیت کے ٹائٹل اور اسٹامپ ڈیوٹی ختم کرنے کی تجاویز حکومت کو بھجوا دی ہیں۔

سفارشات میں مؤقف اختیار کیا گیا ہے کہ کسی سوسائٹی کی کمپنی کا حصہ بننے کو جائیداد کی فروخت تصور کرنا درست نہیں۔ ذرائع کے مطابق ادارہ تبدیل ہونے کی صورت میں زمین فروخت نہیں ہوتی، اس لیے اس پر ٹیکس عائد نہیں کیا جا سکتا۔

بورڈ آف ریونیو کا کہنا ہے کہ بھاری ٹیکسوں کے باعث متعدد کمپنیاں پنجاب چھوڑ رہی ہیں، جو صوبے کی معیشت کے لیے نقصان دہ ہے۔ ذرائع کے مطابق لاہور میں صرف دو کیسز میں ایک ارب 38 کروڑ روپے کا ٹیکس بنایا گیا، جو قواعد کے مطابق جائز نہیں تھا۔

سفارش کی گئی ہے کہ ایسے کیسز کو جائیداد کی منتقلی کی تعریف سے خارج کیا جائے۔ ذرائع کا کہنا ہے کہ پالیسی میں اس تبدیلی سے ہاؤسنگ اور کاروباری شعبے کو نمایاں ریلیف ملے گا اور سرمایہ کاری میں اضافہ متوقع ہے۔