شاہدسپرا:سوئی ناردرن گیس کمپنی میں ارجنٹ فیس کے ساتھ جمع کروائی گئی کنکشن درخواستیں التواء کا شکار ہو گئیں۔
ذرائع کے مطابق ایک ماہ گزر جانے کے باوجود ایل این جی کی بنیاد پر جمع شدہ درخواستوں پر ڈیمانڈ نوٹس جاری نہیں ہو سکا۔
صارفین نے ارجنٹ فیس ادا کر کے گیس کنکشن کی درخواستیں جمع کروائی تھیں، تاہم کمپنی کی جانب سے 25 ہزار روپے کے ابتدائی ڈیمانڈ نوٹسز کے اجرا میں غیر معمولی تاخیر ہو رہی ہے۔
اطلاعات کے مطابق ارجنٹ فیس کے اجرا کے تمام اختیارات کمپنی کے ہیڈ آفس میں مرکوز ہیں۔ ہیڈ آفس سے ڈیمانڈ نوٹس جاری ہونے کے بعد ریجنل دفاتر صارفین کے مقامات کا سروے مکمل کریں گے۔
سروے کے بعد سکیورٹی اور سروس چارجز کے ڈیمانڈ نوٹسز جاری کیے جائیں گے، اور دونوں نوٹسز کی ادائیگی کے بعد صارفین کو گیس میٹر نصب کر دیا جائے گا۔