کلیم اختر:سلفیوں اور ضبط شدہ سمگل شدہ اشیاء کے ساتھ ٹک ٹاک اور دیگر سوشل میڈیا پلیٹ فارمز پر تشہیر کا سلسلہ نہ رک سکا، جس پر فیڈرل بورڈ آف ریونیو (ایف بی آر) نے سخت نوٹس لے لیا ہے۔

 ایف بی آر نے کسٹمز فیلڈ فارمیشنز کے افسران اور اہلکاروں کے سوشل میڈیا استعمال پر واضح ہدایات جاری کرتے ہوئے بغیر اجازت سوشل میڈیا کے استعمال کو مس کنڈکٹ قرار دے دیا ہے۔

ایف بی آر کی جانب سے جاری ہدایات کے مطابق سرکاری ملازمین، بالخصوص کسٹمز افسران و اہلکاروں کو پیشگی اجازت کے بغیر سوشل میڈیا پلیٹ فارمز کے استعمال سے روک دیا گیا ہے۔ گورنمنٹ سرونٹس کنڈکٹ رولز 1964 کے تحت سوشل میڈیا کے غیر مجاز استعمال کو نظم و ضبط کی خلاف ورزی قرار دیتے ہوئے خلاف ورزی پر کارروائی کا عندیہ بھی دے دیا گیا ہے۔

ایف بی آر نے اسٹیبلشمنٹ ڈویژن کے نوٹیفکیشنز پر سختی سے عملدرآمد کی ہدایت جاری کرتے ہوئے 25 اگست 2021 اور 2 ستمبر 2024 کے آفس میمورنڈمز تمام متعلقہ افسران کو بھجوا دیے ہیں۔ نوٹیفکیشن میں واضح کیا گیا ہے کہ کسٹمز فیلڈ فارمیشنز کے تمام افسران و اہلکار قواعد و ضوابط پر مکمل عمل کے پابند ہوں گے۔

ہدایات کے مطابق سوشل میڈیا پر کسی بھی قسم کے سرکاری امور، آراء یا معلومات شیئر کرنے سے قبل مجاز اتھارٹی سے اجازت لینا لازمی ہوگا۔

ایف بی آر کا کہنا ہے کہ یہ اقدامات نظم و ضبط برقرار رکھنے، ادارہ جاتی ساکھ کے تحفظ اور سرکاری معلومات کو غیر مجاز تشہیر سے بچانے کے لیے اٹھائے گئے ہیں۔